تفاحه القهوه

                        بسم الله الرحمن الرحيم 

" تفاحة القوة " 

كان ياما كان يا سعد يا اكرام ما يحلى الكلام الا بذكر النبى عليه افضل الصلاة و السلام ...

كان فى ولد اسمه : حمزة .. سنه : 7 سنين 

حمزة عايش مع مامته و باباه .. فى بيت متوسط .. 

حمزة ولد مش بيرضى ياكل اكل كتير اوى و منها الفاكهه و الخضار.. حاول باباه يقنعه بانهم مفيدين جدا بس ديما كان يفشل معاه .. و بالرغم من صغر سن حمزة بس كان عنده شخصية شوية .. بيعرف يقول لا .. بس للاسف كان رأيه غلط و كلام اهله كان كله صح ..

حمزة بدا يكبر و جسمه ضعيف .. 

حمزة : ماما انا هنزل اللعب مع اصحابى كورة .. 

مامت حمزة : يا حمزة انت ديما بتقع .. انت جسمك ضعيف 

بلاش تنزل .. العب هنا مع اختك ليلى ..

حمزة : ليلى بنت و انا ولد و مفيش ولد بيلعب مع بنت ..

مامت حمزة : طب انا مش موافقة انك هتنزل تلعب فى الشارع ...

حمزة : بس انا عايز ألعب..

مامت حمزة : خلاص اسمع كلامى و لو سمعت الكلام هتنزل تلعب ..

حمزة : ماشى ..

مامت حمزة دخلت المطبخ و حضرت كمية كبيرة من التفاح و العنب و المشمش .. 

و تقريبا دى الحاجات اللى حمزة مش بياكلها فى الفاكهه ..

خرجت مامت حمزة بالفاكهه و قالت : 

لو كلت كل الفاكهه دى هتنزل تلعب ..

حمزة : يا ماما انا مش بحبها .. و بعدين يعنى دول هيعملولى ايه !! 

مامت حمزة :  هيعمل كتير .. انت مش عارف الفاكهه مفيدة ازاى ..

حمزة : مفيدة ازاى ؟!

مامت حمزة: الفاكهه فيها فيتامينات كويسة اوى لاى جسم طفل .. و حتى الكبار بياكلوا منها مش عشان بس بيحبوها ..

عشان كمان فيها الفيتامينات اللى بتساعد الجسم يكون قوى .. 

حمزة : يعنى لو كلت الفاكهه دى مش هقع و انا بلعب كورة ؟!

مامت حمزة : جرب و شوف بنفسك .. 

و بالفعل حمزة اكل كل الفاكهه بس جه تانى يوم و قال لمامته : ماما انا مش حاسس بحاجه .. لسه جسمى ضعيف ..

مامت حمزة : كل حاجه فى الدنيا بتحتاج شوية وقت .. اصبر كده اسبوع .. 

حمزة : خلاص انا هسمع الكلام و هصبر بس لو فضلت زى مانا مش هاكل فاكهه دى...

مامت حمزة : طب قولى بقا الفاكهه طعمها حلو ولا لا ؟

حمزة : طعمها حلو ..

مامت حمزة : طب شوف بقا حاجه طعمها حلو و كمان هتستفيد منها .. احسن من الشيبسي ..

حمزة : و ماله بقا الشيبسي؟!

مامت حمزة : الشيبسي فى حاجات مضرة اوى للاطفال .. 

حمزة : بس انا بحبه .. 

مامت حمزة : انا هعملك احلى شيبسي بس هيبقى شيبسي ماما اللى بتحب حمزة و عايزاه احسن و اقوى ولد فى الدنيا 

حمزة بحب حضن مامته .. 

بعد مرور اسبوع .....

حمزة بقى قوى جدا و جسمه اتحسن و بقى اجمد من اى ولد .. و كانت دى سحر الفاكهه و خصوصا التفاح اللى كله فيتامينات ... 

و كبر حمزة و بقى اشطر شاب فى الملعب .. و الفاكهه بقت روتين فى يومه و حاجه مميزة ماينفعش يعدى يوم من غيرها ...

و توتة توتة خلصت الحدوتة